(1899) Las jazañas de los vieyos

link

En el pueblu de Berodia
Suena infernal algazara
Que güelve tochu al que tenga
La cholla más asentada.
Tocan per equí ronquiellas,
Pe´ lloqueros y latas.
Suenan aculla almireces,
Los cazos andan en danza;
Y en tantu, mozos y críos
Y alguna qu´otra rapaza
Dando gritos y achillidos,
Risas, voces y palmadas,
Allumbrándose con velas
Metidas en calabazas
Juracadas per un llau
Qu´al mas animosu plasman,
Andan recorriendo ´l puelu
A las dos de la mañana.
¿qué mil demontres acurre?
¿Qué diañes e lo que pasa
En mio pacíficu puelu
P´andar tan juera del agua
No solu mozos y críos
Sinó tamién las rapazas?
¡Ay, recoya, el no acertar
Jora grande rozinada!
Él qu´el tíu Trifón el tuertu,
De tres anuncias se casa
Con Tecla que ya enviudó
De Xuanón el de la Páxara;
Por eso todos los mozos,
Los críos y las rapazas
Arman tal algarabía
Como si el llugar arriara;
Y en esta despusición
Allegaren xunta casa
De la novia, soponiendo
Que Trifón la ´ compañaba,
Con propósitu de dayos
Una güena serenata.
…..
-¡Ay, Trifón, Trifón queridu!
¡Ay, Trifón de la mió alma,
Los demontres del infiernu
Allegaren xunta casa.
¡Ay, Tecla, Tecla querida,
Ay, Tecla, Tecla estimada,
Esto qu´agora asucede
De fiju lo barruntaba;
Qu´ el diablu no tien que jer
En ´onde está esa canalla.
¡Y quiera Dios que con bien
Libremos, jiya del alma!
-¿Habían de propasase
Á colar dientro de casa?….
-Esos pillos de rapaces
Á más qu´eso se propasan;
Pues el día casóse
El Miruellu y mio cuñada,
La que joy muyer de Pachu,
(Qu´ esté á güen llugar so alma),
Coxólos una catierva
De mozos sin aducancia,
Metiólos dientro d´un carru
Y llevólos á las Llanas
Á muyalos en un pozu
Pa qu´en elli refriescaran….
-¡La Virxen de la Salú
Nos libre de tal disgracia,
Que si eso jacen con nos
De xuru qu´á mi me matan!
-¿Jacelo con nos? …¡Recoya!
¡Eso tan solu faltaba!…
Pero no, querida Tecla,
Puedes estar descudiada,
Qu´anque ero vieyu setenu
Tengo travesada l´alma
Y tengo el jégadu y bazu,
El polmón, ó la corada
Aquí, amira, n´esti pechu
Que por naide s´acordaba.
¡Y viva Dios que la groma
Resulta groma pesada.
Y dalgún puede que lleve
Pa ´rascar una semana!….
-Ay, Trifón, ¿qué vas á jer?
¡Ten por Dios susiegu y calma!…
-¿Qué vo á jer? No m´asujetes;
Vo a dayos una escagacia
Que los va llevar el diablu
Cuando mi güelan las barbas.
-¡Ay, probe de mi contigu!
¡Ay, triste y de consolada,
Que te mi van á matar
Si sales solu de casa!
Llora Tecla y s´arrepela
Y ponse jecha una llástima
Y no e quién d´asujetar
A Trifón, que se i escapa
Pe la puerta, con un palu
Más llargu qu´una guiyada.
Asina que los rapaces
Sienten dar la portalada,
Piescan todos á correr
Como si tovieran alas;
Qu´ el miedu jaz ser lixeras
A las piernas más pesadas.
. …………
-Querida Tecla, aquí estó,
Aquí me tienes, mochacha,
Enxuga al puntu los güeyos
Y amira bien y arrepara
Cómo vengo tou enteru,
Sin una mala puñada.
Sin el mas chicu arrescuñu
Y co las costiellas sanas…
¡Y eso qu´acabo de jer
Una que va ser sonada!…
-¿Qué jecisti? .. ¡No mi asustes!…
-¿Qué jeci? … Pues cuasi nada……
Cuantu de Dios amaneza
No van á jolgar las andas,
Ni tampocu el sacristán
jalando de la campana,
Porque Xicón, el mejor
Jiyu de Toña Torgada,
Queda tendidu n´esquina
D un palu que-i dí, en mios ansias
De jacer un escarmientu,
De jacer una sonada;
Era malu, así pagó;
Quien mal anda, mal acaba.
…….
Apenas el paxarín
Oyó cantar la alborada,
Dexa Trifón el so lechu
Sin maldita la galvana
Y va ver qué joy del probe
Xicón el de la Torgada,
Si tien resuelín entovía
O si ya espurrió la pata;
Busca n´un llau, busca n´otru
Soba los güeyos y…..¡nada!
No alcuentra muertu á Xicón
El jiyu de la Torgada…
Más, si jallo el desgraciau
En suelu la mejor vaca
Que tenía n´el rabañu
jecha la probe una llástima,
(Tantu, qu´ el mesmu Cuayau
No joy capaz de sanala);
Traía los cuernos rotos,
Las patas d´atrás quebradas,
La rabadilla partida
Y además descaderiada,
Sin cuntar con qu´en so cuerpu,
No había costiella sana.
Tan juertes joren los palos
Qu´apurrió á la probe vaca
Trifón, la noche anterior
Ciegu de coraxe y rabia,
Piensando que dab´al jiyu
De Toñona la Torgada.